Bousauts qu’abét bist, sinoû entenut à parlà, deu boussaloû chinoès de pates jaunes; que biengou à l’estuyoù d’û toupî carreyàt de Chine en-là, enço d’û biadjadoù lot-e-garounés. Desempuch aquét die, noû-s pot tirà deu puchèu. De Paris en-là lous sapiéns éts-mediches ce disen de qu’ey bitare tau coum boussaloûs deus metches, e n’ey pas reyte de’u cassà permou d’està hère plâ acasat per nouste, e puch n’ey pas tan mey machàn qu’û gnaut.
Que cau toutû amuchà-b la bite bitante e lou tesic d’aquét boussaloû pas tan amistous qu’aquò: au primtéms, la reyne que-s bastéch soulete l’arramat boussaloè en clouquà lous prumès oèus; ad-arroun que baderàn ûes oubrères qui-s bastiràn û nid de trés empans de larg. Per l’estiu, que’s coumpte dehens lou nid quauques dèts mile boussaloûs e lous màscles que s’y hen ta ha reynes nabères. Au cluc de l’abòr, las reynes beròy empregnades que’s ban cercà ûe tute per assoubacà-s deu tourrà e atau esperà lou printéms nabèt. Entertàn, lous mascles e las oubrères que s’estadechen e que’s tourren.
Coum at bedét, que s’y semble hère au boussaloû de nouste, sinoû d’abé pates saures e bét nid de papè mascalhadís: que’s paréch que lous chinoès e soun lous qui an hèyt lou prumè papè sampe’n espiàn aquéstes boussaloûs quin hén enta encartounà lou nid.
Abisàt-be toutû d’argoeytà tout aquero trop en-çà. Lou boussaloû de pates jaunes, tau coum lous nabéts escaduts, qu’ey drin jelousàs de l’oustàu. Lou qui bòu hà-u miasses, quey hissat autalèu : per tan qui la hissade d’û boussaloû soulét n’estousse brigue leyàu, que s’y pot està, mes toutû quan déts mile e s’y hén amasse, e quan brounéch aquét boulatùmi espantàt, be-m poudét crede de que baù mielhe decarrà per noû gahà-s la bourruguère !
A d’espàr d’aquò, ne serè pas û machàn besî se n’ère pas tan gourmàn d’abelhes: lou soû plasé qu’ey de’s minjà abélhes coum car ta-s hà mey hort, e las abelhes de nouste ne soun pas tan finotes coum las de Chine, perqué ne’s menchiden pas deu machantè de l’estragn e ne saben guaire defende-s.
Qu’ey plâ aysit ta d’aquét herumi de’s hicà en cèrques deu dequé e de pampareyà à l’ore deu brespè: que’s boute à l’estrém deu mantét de l’abelhè e quan ûe abelhòte e se’n ba per dehore hourrupà flous, que hounéch capbàt coum û hòu, que l’arrape autalèu, que’u coupe lou cap d’û cop de machère e que’s minje la praubasse dehet.
Las abelhes chinoèses, que saben quin cau hà ta-s tirà aquét hastiàu deu tour: que déchen dus ou trés argoeytares susbelhà lou parsâ, e quan û boussaloû e s’y hè trop en-çà, qu’apéren biahore û centenàt de sourdats qui s’apatchoquen ad-arroun deu boussalû e touts, de gusmét, que’s hiquen à brouní à hum d’ales tà cauhà l’ayre coum s’estè ûe hournère. Atau eschourdàt e eslamàt per aquère aujourade, estarrabounit e arrustoàt de pertout, aquét coucàr de boussaloû que se’n ba hore l’abelhè e noû s’y tourne jaméy gahà; à cops que se’n mouréch d’aquère hèyte.
Las abelhes de nouste que’s dechen hà, permou de’s pensà que lous boussaloûs, tè, que soun touts pariè, e que minjen sounque higues ou poumes.
Lous mèstes deus abelhès que’n an hartère d’aquestes boussaloûs impourtats e quauques-ûs qu’at an tout dechà de hà méu; las abelhes de nouste que soun lhèu miaçades per aquét herumi, mes que s’y pot pensà de que la nature e sie plâ hèyte; û bét die, quoan las abelhes quilhen lou cap, segû que boutaràn lous boussaloûs de pates jaunes là-hore deu larè. Atau qu’ey.

Bruno deu Barràlh